Proyectos

Entre o 14 e o 19 de xullo en Medialab Prado impartimos, xunto coa compañía de teatro Impromadrid, un obradoiro sobre propostas escénicas no espazo urbán utilizando aplicacións móbiles. Este obradoiro, articulado seguindo o tradicional modelo de Medialab como encontro de produción colectiva de varias propostas seleccionadas nunha convocatoria aberta previa, ao longo dunha semana, foi organizado no marco do Festival Fringe Madrid e pretende ser o punto de partida para unha futura colaboración entre o equipo de noTours e o de Impromadrid.

Con motivo da participación da Domus e o Museo das Ciencias da Coruña no programa europeo Kiics, en novembro de 2013 e xaneiro de 2014, impartimos dous obradoiros de Arduino con Pduino para rapaces de entre 13 e 16 anos e profesores de Educación Secundaria. A proposta do obradoiro consistiu en achegarse ás enormes posibilidades de Arduino utilizando dispositivos sinxelos como potenciómetros, LED, acelerómetros ou motores servo, co fin de promover que, posteriormente, os rapaces participantes desenvolvesen pequenos proxectos creativos con Arduino.

Ao longo deste ano, a través de Escoitar.org, estamos desenvolvendo xunto co lab de locative media GPS Museum, un proxecto encargado polo CCEMx (Centro Cultural de España en México); a posta en marcha do Mapa colaborativo do Exilio español en México. Este proxecto de cartografía colectiva emocional sobre un momento fundamental da nosa historia forma parte das diferentes actividades organizadas para o programa do 75 aniversario do Exilio español, da conmemoración do fin da Guerra Civil española, e da chegada a México da maioría dos aproximadamente vinte e cinco mil refuxiados acollidos en dito país.

Acabamos de estrear unha nova colaboración entre Ania González (especialista en Museoloxía e Teoría crítica) e Horacio González (Artista dixital), que partindo da pregunta feita pola teórica feminista Gayatri Spivak Can the subaltern speak?, propoñen unha serie de exercicios metodolóxicos entorno á (im)posibilidade da comunicación baixo o título de Can Spivak Speak?

O primeiro exercicio desta serie que explora a linguaxe e o código como estruturas que unen e separan, foi presentado o 31 de maio, no ciclo de conversas A2 produções em torno da arte contemporânea, en Culturgest (Porto).

A paisaxe sonora do Miño é unha interface HTML5 baseada en PlayerMap deseñada, co fin de facer un punto de escoita interactivo para pantalla táctil, con motivo da exposición Auga Doce celebrada na Cidade da Cultura de Galicia entre o 21 de marzo e o14 de setembro de 2014. Contén rexistros sonoros do curso do río Miño repartidos ao longo do seu percorrido, desde o seu nacemento no Pedregal de Irimia ata a súa desembocadura no Farol da Insua, para amosar a súa riqueza e a súa sonoridade.